Tími á blogg

Jæja, er ekki kominn tími á smá blogg? Ekki það að það hafi neitt sérstakt gerst, bara búin að vera í fríi um jólin og áramótin og byrjaði að vinna aftur í gær, svo er frí á morgun vegna þess að fiskurinn kláraðist.

Ég get þó sagt ykkur það, að þrátt fyrir 3 kg. af Mackintosh, 1 kg. af Nóa Sirius konfekt og nokkrar tegundir af smákökum (fyrir utan allt hitt) þá hef ég ekkert þyngst um jólin, ekki eitt einasta kíló. Mín er ánægð. Nú hljómar það eins og ég hafi étið þetta allt, en sem betur fer fékk ég hjálp hjá hinum fjölskyldumeðlimunum.

Ég hef reyndar ekkert prjónað, eða eiginlega ekkert. Tók aðeins í prjónana meðan ég var að horfa á þriðju LoTR myndina. Prjónaði þá aðeins kjólinn hennar Telmu, hef ekki nenn í mér að halda áfram með Íd, en veit samt upp á mig skömmina. Þoli ekki, þegar eitthvað liggur og bíður eftir mér, svo ætli ég verði ekki að fara að taka í hnakkadrambið á sjálfri mér.

Annars er ég búin að vera í einum skó núna í eina tvo tíma. Ég er föst. Þetta eru forláta Ecco ökklaskór með rennilás í hliðinni og er rennilásinn bilaður. Núna er ég bara að bíða eftir að kallinn komi heim, svo ég geti beðið hann að reyna. Ég tími ómögulega að skemma skóinn með því að klippa upp rennilásinn, enda eru þetta uppáhalds skórnir mínir. Og alveg fok-dýrir. Skoðaði nýjasta módelið af svona skóm í haust og kosta þeir upp undir 20 þús. spírur.

Talandi um spírur. Það er allt farið að spíra úti í garði hjá mér. Það hafa verið svo mikil hlýindi hérna í eyjum undanfarið, að það er allt farið að lifna við, Kósakkadeplan, Völudeplan, Kornblómin og Næturfjólan eru allar komnar af stað. Svo eru einhverjir laukar, held að það sé Muscari, farin að láta sjá sig. Ég hef miklar áhyggjur af þessu, það er jú bara 6. janúar, en garðurinn lætur eins og það sé apríl. Ég er ansi hrædd um að þetta líf sem þarna er að kvikna, eigi eftir að slokkna í næsta frosti, sem kemur alveg örugglega.

Jæja, farin að elda.

Athugasemdir

[Ásthildur Cesil Þórðardóttir, 7.1.2009 kl. 12:53]

Æ Æ Matthilda mín, reyndirðu að setja smjör á lásinn?  Virkar oftast.  Gleðilegt ár til þín og kærleikskveðja.  Alltof langt síðan ég hef litið hingað inn til þín.

[Matthilda M. Eyvindsd Tórshamar, 7.1.2009 kl. 13:59]

Kallinn reddaði þessu með bréfaklemmu

[Sigrún Þorbjörnsdóttir, 7.1.2009 kl. 23:29]

Gott að þú komst úr skónum. Maður fer nú ekki að skemma rándýra skó þessa dagana.. Ég er alltaf að reyna að fá mér prjónapásu en gengur ekki nógu vel. Er komin með prjónaverk. Ætla að gera eina lopapeysu í viðbót og kasta þessu svo frá mér í smátíma.

[Bóla (IP-tala skráð) 8.1.2009 kl. 12:48]

Nú skil ég af hverju þú komst ekki úr skónum þegar þú komst til mín,hann var FASTUR á þérJá ég er´nú svolítið smeyk með gróðurinn þegar fer að frysta aftur.Það benti mér ein á að setja einangrunarull á Rósirnar þá myndu þær þola betur kuldann