Leitin mikla

Ég er nú ekki búin að vera neitt svakalega dugleg í tölvunni síðustu daga, hef aðallega verið að skoða hús á netinu.

Kaupandinn sagði já við gagntilboðinu okkar, þannig að nú erum við að leita, erum búin að skoða 3 hús, förum aftur að skoða allavega eitt þeirra aftur í dag og ætlum (vonandi) að taka smið með okkur. Við skoðuðum 2 hús á föstudag, hættum við annað eiginlega strax útaf þakinu, það er gamalt asbest þak, ekki gott fyrir fólk með astma, við getum ekki verið að kaupa hús og þurfa að byrja á því að skipta um þak, það er alltof mikið mál og kostnaðarsamt. Ég var rosalega hrifin af hinu húsinu, það myndi líka henta okkur, en erum svolítið í vafa með staðsetninguna, en það er við mikla umferðargötu.

Það er ekkert mikið af húsum á sölu einmitt núna, og okkur liggur á, kaupandinn vill nefnilega fá húsið 1. mars, en hann gerir sér samt grein fyrir því að við getum ekki farið á götuna, eins og fasteignasalinn orðaði það.

Er búin að velta þessum málum mikið fyrir mér undanfarna daga, svo mikið að ég hef verið svolítið utan við mig.

Í gær var ég að versla niðri í Krónu og fór svo í hvíta húsið. Þegar ég kom tilbaka, sá ég lítinn, rauðan bíl, opnaði hurðina og ætlaði að setja það sem ég var búin að kaupa inn að aftan. Þá tek ég eftir manni við stýrið, skildi ekkert í neinu en fattaði svo alt í einu að þetta var vitlaus bíll. Ég varð alveg eins og asni. "Fyrirgefðu, ég ruglaðist á bílum" sagði ég við manninn og lokaði hurðinni. Hann opnaði hurðina að framan, skellihlæjandi og sagði:"Já, það er svo mikið af svona bílum, ekki skrýtið að maður ruglist." Mér leið eins og hálfvita, þegar ég labbaði að bílnum mínum. Stupid. 

Athugasemdir

[Guðrún María Óskarsdóttir., 13.1.2008 kl. 03:17]

Gangi ykkur vel Matta mín.

He he álíka tilvik hefur hent mig einnig varðandi það að reyna að opna bíl sem ég átti ekkert í með mínum lykli sem ég skildi ekkert í að virkaði ekki, humm humm maður var eitthvað að flýta sér of mikið ...

kv.gmaria.

[Ester Sveinbjarnardóttir, 13.1.2008 kl. 18:57]

Gangi ykkur vel, þetta er mælikvarði um mikið álag á þér Matta mín, álag vegna óvissu er oft þungt og kemur upp á yfirboðið með hinum óvæntasta hætti. ;)