Leggjalangur klunni

Uppáhalds teiknimynd yngstu dóttur minnar þessa dagana er Hundalíf, þessi gamla á spólu. Það er horft á þetta dag út og dag inn. Ein setning sem kemur fyrir í myndini er nokkurnveginn á þessa leið:"Út með þig, leggjalangi klunninn þinn."

Í gær var ég svo stödd niðri í Krónuni með hana með mér. Fyrir framan okkur var grannur, hávaxinn maður. Þá hvíslar sú stutta að mér:"Leggjalangi klunni." Ég átti bágt með mig.

Smá stund seinna vorum við í biðröð við kassann. Á næsta kassa var vinkona elstu dótturinnar að afgreiða. Þá kallar skottan til hennar:" Flottur varalitur, Lilja." Ekki hafði ég tekið eftir því að stelpan var með varalit.

Þegar ég var svo að setja vörurnar í poka, segir hún:"Þessi stelpa er eins og Lína Langsokkur" og bendir á stelpuna, sem var að enda við að afgreiða okkur. Hún var með þessar fallegu freknur.

Ótrúlegt, hvað börnin taka vel eftir.